„Eina niðurstaðan sem við lesum úr þessum dómi Hæstaréttar, er að ráðherra hafi heimild til að misnota vald sitt,“ segir Friðrik G. Halldórsson, talsmaður Samtaka dragnótamanna í samtali við Morgunblaðið í dag í kjölfar dóms Hæstaréttar fyrir skömmu. „Að sjálfsögðu munum við halda áfram þar til réttlætið sigrar,” segir hann einnig í fréttinni, sem lesa má hér í heild.
Útgerð frá einni fámennustu og afskekktustu sjávarbyggð á landinu tapaði máli í Hæstarétti gegn sjávarútvegs- og landbúnaðarráðherra.
Hæstiréttur komst að þeirri niðurstöðu að Jóni Bjarnasyni hafi verið heimilt að banna veiðar með einu veiðarfæri í Skagafirði án þess að þurfa að fara með það í gegnum löggjafaþingið eða færa fyrir því fiskifræðileg eða vistfræðileg rök. Hann skipaði mann úr hópi trilluútgerðarmanna sem margoft hafa lagt til bann við dragnótaveiðum, til að vinna að reglugerð án aðkomu hagsmunaaðila eða Hafrannsóknastofnunarinnar að öðru leiti en að fá aflatölur. Ráðherra þurfti ekki að sýna fram á það með rökum að þessi lokun hafi einhvern jákvæðan tilgang. Eftir 100 ára nær samfeldar veiðar með dragnót getur einn maður sem enga þekkingu hefur á viðfangsefninu tekið slíka ákvörðun.
Samtök dragnótamanna hafa bent fyrrverandi ráðherra á að þessi ákvörðun fari gegn þjóðarhag. Þjóðin verði af gjaldeyristekjum af flatfiskstofnum sem ekki verða nýttir með veiðum með öðrum veiðarfærum.
Ráðherra má skipa hagsmunaaðila í einum útgerðarflokki til að vinna að reglugerð gegn öðrum útgerðarflokki. Ráðherra má hunsa rannsóknaskýrslu þeirrar stofnunar sem fer með rannsóknar- og ráðgjafahlutverk í þessum málum. Ráðherra má skipa nefnd sér til ráðgjafar þar sem sonur ráðherra sem áður hefur ályktað og tekið afstöðu í málinu. Ráðherra ber að leita álits hagsmunaaðila í málinu skv. lögunum, en Ráðherra þarf ekki að taka tillit til þeirra álits þeirra að nokkru leiti. Með öðrum orðum, ráðherra má gera nánast hvað sem honum dettur í hug – það er allt varið með lögum.
Í niðurstöðu dóms kemur fram að þó að dragnótaveiðar hafi verið stundaðar með örfáum hléum í 100 ár í Skagafirði séu þær í raun bannaðar og þar sem bannið sé tímabundið og hægt að veiða fisk í önnur veiðarfæri þá sé þetta löglegt. Gallinn er sá að í innanverðum Skagafirði má ekki veið fisk í veiðarfæri sem ekki var þekkt þegar Kristur gekk á jörðinni.
Dóminn má lesa hér.
Samtök dragnótamanna taka heilshugar undir efnistök Pawels Bartoszek sjá umfjöllun á eyjan.is um störf Jóns Bjarnasonar, fyrrverandi sjávarútvegs- og landbúnaðarráðherra. Samtökin geta bætt við þennan lista yfir ófagleg vinnubrögð ráðherrans fyrrverandi, þar sem hann fer gegn almannahagsmunum til að þjóna örfáum frístundasjómönnum og lokaði á vistvænar strandveiðar með dragnót. Skýrslu Hafró um áhrif dragnótaveiða á botndýralíf í innanverðum Skagafirði var stungið undir stól. Hún þjónaði ekki þeirri pólitík sem ráðherrann fyrrverandi stendur fyrir og hefur falið BíoPol á Skagaströnd að rannsaka lífríkið, líklega í von um niðurstöðu sem fellur að þeirri afturhaldssömu pólitík sem fyrrverandi ráðherra stendur fyrir. Ekki ætlum við að gefa okkur fyrirfram að Jóni verði að ósk sinni fyrr en niðurstaða liggur fyrir. Þegar vísindastofnun getur ekki skilað niðurstöðum sem falla að pólitískri stefnu, þá er bara að skipta um stjórnarformann! Það sem ráðherranum fyrrverandi yfirsést er að Hafró vinnur eftir alþjóðlegum vísindaaðferðum og þær breytast ekkert við það að skipta um stjórnarformann.
GreinPawels má lesa hér.
Aðalfundur Samtaka dragnótamanna verður haldinn laugardaginn 26. nóvember 2011 á Fosshótel Lind, Rauðarárstíg 18 kl. 14:00.
Auk venjulegra aðalfundarstarfa munu gestafyrirlesarar frá Hafrannsóknastofnuninni mæta. Samtök dragnótamanna hafa einnig farið þess á leit við sjávarútvegsráðherra að hann eða fulltrúi hans kynni fyrir fundarmönnum hvað það er í lífríkinu á grunnslóð sem hann telur að dragnótin ógni. Víðtækar lokanir veiðisvæða eru farnar að ógna tilvist þessa grunnveiðarfæris. Ráðherra hefur enn ekki svarað þessari umleitan.
Það var ánægjulegt að heyra viðbrögð Jóns Bjarnasonar sjávarútvegs- og landbúnaðarráðherra, þar sem hann segir hvorki lagalegan né vísindalegan grundvöll fyrir aðgerðum Bandaríkjanna vegna hvalveiða Íslendinga.
Það væri enn ánægjulegra ef hann liti sér nær og skoðaði hvað hann er sjálfur að gera þeim sem stunda dragnótaveiðar. Hann hefur tekið einn og óstuddur , einhliða ákvörðun, án nokkurs samráðs við hagsmunaaðila og án nokkurra vísindalegra eða vistfræðilegra raka um að loka stórum svæðum fyrir dragnótaveiðum og gert útgerðum nær ómögulegt að stunda sínar veiðar á meðal annars vannýttum tegundum hér við land.
Eini munurinn á aðgerðum Obama og Jóns, er að Obama er að höfða til umhverfis(fasista) en Jón að kaupa sér vinsældir í hópi frístundasjómanna.
Gæðakönnun Matís á ferskum, ísuðum fiski, sem seldur var á markaði í Hull og Grimsby á síðasta ári, leiðir í ljós að besti fiskurinn kemur af dragnótabátum, sem sjávarútvegsráðherra hefur lagt í einelti undanfarin tvö ár. Dragnótabátar skipa sér í þrjú efstu sætin á lista yfir gæði afla. Efst á listanum er Geir ÞH 150, þá kemur Sólborg RE 270 og þá Aðalbjörg RE 5. Aðalbjörgin var efst á sambærilegum lista 2009. Sjá nánar á vef Matís.
Ákveðið hefur verið að mál dragnótaútgerðar í Grímsey gegn sjávarútvegsráðherra fái flýtimeðferð fyrir Héraðsdómi Reykjavíkur. Útgerðin hefur höfðað mál til viðurkenningar á ólögmæti banns við dragnótaveiðum í Skagafirði. Málið er höfðað á þeim grundvelli að réttur útgerðarinnar til veiða með dragnót sé atvinnuréttindi sem njóti verndar stjórnarskrár. Líklegt má telja að fulltrúar í Stjórnlagaráði fylgist vel með þessu máli enda reynir þar á hvort skoðun ráðherra geti verið rétthærri en ákvæði stjórnarskrár.Frétt þessa efnis má lesa hér.
Samtök dragnótamanna hafa sent sjávarútvegsráðherra enn eitt bréfið, þar sem hann er krafin svara við spurningum sem samtökin hafa ítrekað sent honum. Öll þau svör sem samtökin hafa fengið frá ráðherra til þessa bera merki þess að hann fari undan í flæmingi og veigri sér við því að svara spurningunum efnislega eða með haldbærum rökum. Bréfið sem ráðherra var sent fyrr í vikunni má lesa hér fyrir aftan. Til að lesa svör og fyrri bréf til ráðherra farið inn á forsíðu SD.
Ekki verður annað lesið úr svarbréfi sjávarútvegsráðherra til Samtaka dragnótamanna, að hann kjósi frekar að nota álit norsks starfshóps hagsmunaaðila um áhrif dragnótaveiða á staðbundinn fiskistofn (kystorsk) við Noreg en að byggja á niðurstöðum vísindarannsókna Hafrannsóknastofnunarinnar.
Í bréfinu, sem dagsett er 7. mars sl., kemur einnig fram að ráðherra telur það ekki hafa komið að sök við skipan í starfshóp um verndun grunnslóðar í Skagafirði, að hann hafi haft vitneskju um að einn tilnefndra hafði áður lýst andstöðu sinni við dragnótaveiðarnar í krafti stöðu sinnar sem sveitarstjórnarmaður í Skagafirði.
Í svarbréfi ráðherra segir m.a.: „Í vinnuhópa af því taginu sem hér um ræðir eru oft skipaðir fulltrúar gagnstæðra sjónarmiða …“ Þetta eru orð að sönnu. Hið hlálega er hins vegar að í þessu tilviki hafnaði ráðherra tilnefningu fulltrúa hagsmunaaðila.
Svarbréf ráðherra má lesa hér.Svar radherra 7.mars 2011
Samtök dragnótamanna hafa sent sjávarútvegs- og landbúnaðarráðherra bréf, þar sem ítrekaðar eru óskir um svör við spurningum sem bornar voru fram í bréfi samtakanna þann 1. desember 2010. Samtökin telja að í svarbréfi ráðherra frá 22. desember 2010 hafi hann ýmist sniðgengið eða snúið út úr fyrirspurnum sem þar voru lagðar fram. Þar sem svör ráðherra eru að okkar mati ófullnægjandi viljum við hér með ítreka þær [spurningarnar] og bæta einni við að auki, segir m.a. í bréfi samtakanna, sem sent var þann 14. febrúar sl.
LÍÚ Sjávarútvegsráðuneytið Hagstofan Reiknistofa fiskmarkaða
